Contoh Dharma Wacana Bahasa Bali

Berikut adalah contoh dharma wacana bahasa bali, bertema Hari Raya Saraswati.

Dharma Wacana Indik Rahina Saraswati

Gambar Dewi Saraswati

Om Swastyastu

            Inggih nawagang ring ida dané sareng sami. Ring rahinané sané mangkin, titiang jagi ngaturang dharma wacana indik “Rahina Saraswati”.

            Inggih ida dané sané baktinin titiang, rahina Saraswati rauhnyane ring Saniscara Umanis Wuku Watugunung, sané kelaksanayang nem sasih apisan. Pinaka akéh umat Hindu sami pada astiti bakti, nunas ring Sang Hyang Aji Saraswati utawi sakti Déwa Brahma sané pinaka maniféstasi ring Ida Sang Hyang Widhi, mangda ngemolihang kaweruhan sané mawiguna pisan ritatkala anggén nabdabang jagat. Sané mangkin tegesang titiang kruna “Saraswati “ puniki mawit saking basa Sansekerta inggih punika kruna “Saras” sané mapiteges “mengalir” upami toya utawi bebaos lan “Wati” tegesnyané “ngelahang” utawi “memiliki”. Dados ipun Saraswati mapiteges aliran toya utawi bebaos sané ngelimpahin danu utawi kolam. Pateh sekadi ilmu pengetahuan sané nénten telas - telas ring jagaté puniki.

            Iraga sareng sami sampun tatas uning napi nike ilmu pengetahuan. Pengetahuan punika pateh sekadi sampat sané mresidayang anggén makarya ring gria soang-soang. Pateh malih ring Ilmu sané pacang anggén iraga ngerereh pangupa jiwa rikala ngelamar kekaryan ring kota. Sinamian sané maguna ring kehidupan puniki patut kesuciang. Iraga melajahin ilmu pengetahuan pastika sumbernyané buku. Buku patut iraga suciang inggih punika ring rahina Saraswati. Kawentenang pralambang ring sajeoning palawatan Sang Hyang Aji Saraswati, sané makéh madaging simbol lan artosnyané soang - soang. Rahina Saraswati pastika madue suksman utawi makna sané becik. Titiang mangkin jagi negesang napi manten suksman iraga ngemargiang rahina Saraswati puniki.

Makna miwah simbol-simbol Dewi Saraswati inggih punika:

1. Déwi, inggih punika simbol kekuatan sané indah, cantik, menarik, lemah lembut, lan mulia sekadi sifat saking ilmu pengetahuan punika.
2. Ganitri, inggih punika simbol ilmu pengetahuan sané nénten telas-telas kepelajahin sepanjang zaman.
3. Wina, suksman ipun : Seni, musik, budaya lan suara. Nike mateges simbol keharmonisan manah, parilaksana, ring kehidupan dengan alam.
4. Pustaka suci (keropak), inggih punika simbol srana sané anggen mengabadikan ilmu-ilmu punika, dadosnyané ilmu punika prasida kewarisang ring generasi-generasi sane selanturnyané.
5. Teratai, inggih punika simbol ilmu pengetahuan sané suci. Punapi bunga teratai, mawinan yadiastun angganyané ring lumpur, nanging sekarnyané punika tetep bersih. Teratai utawi Padma puniki akarnyané ring tanah, batang daunyané nika ring toya lan sekarnyané ring udara, nika melambangkan kemampuan idup ring 3 alam (bhur-bhuah-swah).
6. Angsa (hamsa), inggih punika simbol kebijaksanaan, artosnyané prasida membedakan napi sané becik lan napi sané kaon.
7. Merak, inggih punika simbol kewibawaan.

Indik sapulah palih parindikan rahina Saraswati punika kapalihang dados tigang réntétan sekadi piniki:

1. Ring rahina Saraswati punika saking semeng jantos pajeg surya iraga sareng sami maturan ring sanggah utawi mrajan soang-soang miwah mantenin buku utawi lontar druéné. Sakéwanten sadurung maturan, nunas tirta dumun ring Ida Peranda utawi ring sesuunan ragané soang-soang. Sasampun banten punika kantebang raris kasiratin tirta Saraswati pang lima. Wusan punika wau ragané siratin tirta ping tiga, kaajeng ping tiga maraup taler ping tiga. Tetujon iragané nunas tirta Sarawati punika tan lian wantah mangda Ida ngicénin karahajengan miwah kaweruhan sané mautama. Tirta punika taler dados anggén nyuciang raga , ngicalang sakancan kaletehané sané wenten ring ragané, pradéne mresidayang galang apadang ening tan pasing-sing.
2. Réntétan sané kaping kalih wantah masambang semadi. Rikala masambang semadi patut majagra sinambi ngewacén lontar-lontar suci keagamaan, minakadi : Bhagawad gita, Sarasamuscaya, Ramayana, Barathayudha miwah sané lian-lianan. Ring sajeroning sambang semadi punika iraga patut mebrata tan dados mapunyah-punyahan. Brata puniki madué tetujon mangda nénten ngulurin indria ritatkala ngamargiang samadhi, ngewacén lontar-lontar suci punika pinaka tangkis majagra , sinambi nunas pangweruhan majeng ring Sang Hyang Aji Saraswati.
3. Réntétan sané kaping tiga, inggih punika mabanyu pinaruh risampun awengi majagra , mabrata nglaksanayang sambaing semadi. Bénjangné pasemengan raris mabanyu pinaruh ke kabéji utawi kasegara masiram tur matirta. tetujoné irage mabanyu pinaruh wantah nyuciang raga , mangda kaletehané sané wénten ring ragané prasida ical. Rikala mabanyu pinaruh punika irage masiram antuk toya kumkumang, inggih punika toya sané madaging sekar sarwa arum. Usan punika dados sampun mantuk. Sarauhé ring jero dados sampun antebang bantené, sakéwanten siratin dumun antuk tirta Saraswati. Luu banten punika iket antuk tali raris genahang ring luhur koriné utawi lawangané. Tetujon nyané wantah nyihnayang iraga subakti sahe sampun ngamolihang kaweruhan.

Inggih wantah asapunika titiang ngaturang dharma wacana ring para semeton titiang sareng sami yéning wénten atur tititang sané nénten manut ring manah ida dané mangda prasida ragané ngampurayang. Tititang sineb antuk paramasantih.

Om Santih, Santih, Santih Om

    

    Nah itu tadi contoh Dharma Wacana Bahasa Bali, apabila terdapat kekurangan atau kesalahan mohon dimaafkan ya.... Semoga bermanfaat :)

.

.

Ngiring ajegang seni lan budaya bali mangda sayan lestari :)